XİN rəhbərinin müavini: Britaniya hökuməti Qarabağı Azərbaycanın tərkib hissəsi kimi qəbul edir

Xocalı soyqırımı Britaniya Parlamentində müzakirə olunub.

APA-nın Britaniya bürosunun xəbərinə görə, bu gün Britaniya Parlamentinin Lordlar Palatasında Lord Flaytın Xocalı faciəsinə dair hökumətə ünvanladığı şifahi sualı ətrafında qısa debat keçirilib.

Debatda suallar hökumət adından xarici işlər nazirinin müavini Lord Ahmad tərəfindən cavablandırılıb.

Lord Flayt Britaniya hökumətinin Xocalı faciəsinə münasibətdə mövqeyini sorğu edib, başsağlığı mesajının verilməsindən əlavə addımlar atmağa çağırıb. Lord Ahmad 1992-ci ildə Xocalıda baş verənləri Azərbaycan tarixinin faciəvi epizodu kimi qəbul etdiklərini və həmin dövrdəki Britaniya hökuməti tərəfindən baş verənlərin haqlı olaraq qınandığını vurğulayıb. O, Britaniyanın Bakıdakı səfiri tərəfindən Xocalı qurbanlarının xatirəsinə ucaldılmış “Ana harayı” abidəsinə əklil qoyulmasını Britaniya hökumətinin başsağlığı mesajı olduğunu vurğulayıb.

Lord Ahmad Azərbaycan və Ermənistan arasında gedən proseslər haqqında da danışıb. O, iki ölkə arasında dialoqun önəminə toxunub, regionun gələcəyi məsələsinin əhəmiyyətini vurğulayıb. Lord Ahmad, Britaniya hökumətinin beynəlxalq vasitəçilik səylərinə dəstək verdiyini, Aİ, BMT və ATƏT kimi qurumların iki ölkə arasındakı məsələlərin həlli və yekun sülh sazişinin imzalanmasında rol oynaya biləcəyini bəyan edib.

Lord Ahmad Avropa regionu üzrə dövlət naziri Leo Dokertinin bu ilin fevral ayında Bakıya səfəri haqqında danışıb. Nazir müavini bildirib ki, Azərbaycan ilə Britaniya arasında enerji sahəsində və digər məsələlərdə geniş əməkdaşlıq və dialoq aparılır. Lord Ahmad Britaniyanın bu münasibətlərin inkişafına əhəmiyyət verdiyini əlavə edib.

O, həmçinin Britaniya hökumətinin Qarabağı Azərbaycanın tərkib hissəsi kimi qəbul etdiyini də qeyd edib.